25, ఫిబ్రవరి 2020, మంగళవారం
రామచంద్రా అంటే ముక్తి రాకపోయేనా
రామచంద్రా అంటే ముక్తి రాకపోయేనా లేక
రామనామ మనగ మనసు రాకపోయేనా
ఇంత సులభోపాయము నేల విడచి జనులెల్ల
చింతలపా లగుచు నుండి చెడిపోవుచున్నారో
యెంత యోచించినను సుంతైనను బోధపడదు
పంతగించి కలి వీరిని పట్టి లాగు చున్నదా
సులభమైన నామమే సుందరమగు నామమే
పలికినంతనే యొడలు పులకరించు నామమే
పలుక లేరు నిముషమైన భగవంతుని నామము
కలి యంతగ వీరి నకట కట్టి వేయు చున్నదా
హాయిగ శ్రీ రామరామ యనలేని జనావళికి
మాయ తొలగు టెప్పటికో మరి యెవ్వరి కెఱుక
మాయామానుషవేష మహిమ చేయవేని యీ
మాయాదారి కలి యాటలు మాయమగు టున్నదా