18, ఫిబ్రవరి 2020, మంగళవారం

తగవు లాడెదవా నాతో దశరథతనయా


తగవు లాడెదవా నాతో దశరథతనయా చిరు

నగవు లొక రెండు విసిరి నను మురిపింతువు



ఎపుడయ్యా మోక్ష మంటే నేనేమో చెప్పేవు నా

తపన నీ వెరుగనిదా దాటవేసేవు

కుపధములే పట్టితినా కుమతుల దరిజేరితినా

విపరీతము నీతీరని వ్రేలెత్తి చూపితినా



శపథములే చేసితినా చపలత్వము చూపుచు నీ

కపచారము చేసితినా అదరించవు

అపవర్గము నడిగితినా యన్యంబు లడిగితినా

కృపమాలి తగవులకిటు కేరించుచు వచ్చేవు



నృపశేఖర నీయానను నేను కాదంటినా నీ

కపకారము చేయు వాని నగ్గించితినా

యెపుడు నీమాట చొప్పు నేయుందును కాని న

న్నపహసించి తగవులాడి అనందము పొందేవు