మా దైవమా రామ భూపాలుడా

మా దైవమా రామ భూపాలుడా నీవు
    మామాట లాలించి మమ్మేలరా
అదుకొమ్మని వేరు దైవముల మే
    మడుగమురా హరి మమ్మేలరా

నీయానతిని గొని నిలిచెదము మేము
    నీపూజ మానక చేసెదము
నీయందు చిత్తము నిలిపెదము మేము
    నీనామ స్మరణమె చేసెదము
నీయందచందము లెన్నెదము మేము
    నీపాదయుగళమె పట్టెదము
నీయున్నతిని గూర్చి పాడెదము
    మేము నీభక్త కోటిని చేరెదము

భువనేశుడ వని నమ్మెదము మేముక
    నీపైన కవితల నల్లెదము
పవలురేలును నిన్ను తలచెదము మేము
    బాగొప్ప నినుజేర తలచెదము
అవిరళము నీకృప నడిగెదము మేము
    అపవర్గ మొకటే యడిగెదము
భవబంధములు బాప వేడెదము మేము
    పతితపావన నిన్ను వేడెదము

నిను మెచ్చు వారిని పొగడెదము మేము
    నిను తిట్టు వారిని తెగడెదము
అనయము నిన్నే కొలిచెదము మేము
    వినయము కలిగి నిలచెదము
అణువణువున నిను చూచెదము మేము
    అందరిలో నిను చూచెదము
వనజాక్ష నీవే చాలందుము మేము
    వినతాసుతవాహ నీవారము