హాయిగా భక్తజను లందరు కలసి

హాయిగా భక్తజను లందరు కలసి

చేయరే రామభజన తీయతీయగ



ఎంతవారి కైన నుండు చింతలన్నవి

చింతలు లేనట్టివారు సృష్టిని గలరే

చింతలన్ని తీర్చునట్టి శ్రీరాముడు

చెంతనుండగా భీతిచెంద నేటికి



పరమకృపా మూర్తియైన హరిదయవలన

అరుదైనది నరజన్మ మది దొరకినది

పరమభాగవతుల కిది వరమైనది

హరిని సేవించి మోక్ష మందవలయును



అంతకుడు వచ్చుదాక నాలసించక

సంతసముగ హరిభజనలు సలుపుడయ్య

సంతత శ్రీరామనామ స్మరణ మిచ్చు

నెంత పాపి కైన గాని యిట్టే మోక్షము