చాలు చాలు రామనామము చాలు నది యొక్కటే

చాలు చాలు రామనామము చాలు నది యొక్కటే
చాలు చాలు నితరము లందు సంచరించి చెడుట

ఏమీ చదువ నక్కర లేదు ఏమీ తెలియ నక్కర లేదు
ఏమీ చేయ నక్కర లేదు ఏమీ చూడ నక్కర లేదు
ఏమీ తలచ నక్కర లేదు ఏమీ పలుక నక్కర లేదు
ఏమీ వ్రాయ నక్కర లేదు రామనామ మొక్కటి చాలు

ఏమి యందము లక్కర లేదు ఏమి బంధము లక్కర లేదు
ఏమి సంపద లక్కర లేదు ఏమి సౌఖ్యము లక్కర లేదు
ఏమి భోగము లక్కర లేదు ఏమి భాగ్యము లక్కర లేదు
ఏమి బలగము లక్కర లేదు రామనామ మొక్కటి చాలు

ఏమీ త్రుంచ నక్కర లేదు ఏమీ పెంచ నక్కర లేదు
ఏమీ వంచ నక్కర లేదు ఏమీ యెంచ నక్కర లేదు
ఏమి యంత్ర మక్కర లేదు ఏమి తంత్ర మక్కర లేదు
ఏమి మంత్ర మక్కర లేదు రామనామ మొక్కటి చాలు