ఏ రోగమైన గాని యిదే మందు

ఏ రోగమైన గాని యిదే మందు

మీరెల్లరు సేవించ మేలైన మందు



మూడు తాపములు మిమ్ము ముప్పిరిగొనిన

వాడుకగా పెద్దలిచ్చు భలే గొప్ప మందు

పాడు చేదురుచి లేని భలే మంచి మందు

వేడుకగా సేవించ వీలైన దీమందు



ఆరు జబ్బు లొకసారిగ నధికమైనను

పారిపోవు నట్లు చేయు భలే గొప్ప మందు

క్షీరాన్నము కన్న మామంచి తీపి మందు

ఈరేడు లోకంబుల పేరుగల దీమందు



రండి రండి దీని పేరు రామనామము

పండితులకు పామరులకు పసందైన మందు

మొండి భవరోగమునకు ముఖ్యమైన మందు

పండించి జీవితములు బాగుచేయు మందు