అన్నివేళలను ఆరాముడు మనకు

అన్నివేళలను ఆరాముడు మన కండగ నున్నాడు భయమేలా
తిన్నగ శ్రీరామ శ్రీరామ అంటే తీరును చిక్కులు భయమేలా

భయమేలా శ్రీరామ నామమే పాపాటవులను కాల్చుగదా
భయమేలా శ్రీరామ నామమున భవబంధములు వదలు గదా
భయమేలా శ్రీరామ నామమే పాడు యముని భయపెట్టు గదా
భయమేలా శ్రీరామ చింతనాపరులకు నిత్యము సుఖము కదా

భయమేలా హరి రామ రామ యని పాడుచు నుండెడు భక్తులకు
భయమేలా హరి కరుణామృతము పానము చేసెడు భక్తులకు
భయమేలా హరి నిజహృత్పద్మనివాసిగ నుండగ భక్తులకు
భయమేల హరి సనాతనుని తమ వానిగ నెఱిగిన భక్తులకు

భయమేలా జగమెల్ల తిరుగుచు పాడెదము హరి ప్రాభవము
భయమేలా హరిభక్తులము హరిభజనలు చేయుచు తిరిగెదము
భయమేలా శ్రీరామనామమును ప్రజల నోట పలికించెదము
భయమేలా మన నెవరేమన్నను పట్టాభిరాముని పొగడెదము