ఆటగాడ శ్రీరామా నరహరి

ఆటగాడ శ్రీరామా నరహరి అయ్యా నీకొక దండం

నీ సంకల్ప మమోఘము కావున నేనెవడను కాదనగ
నా సుఖమెంచుచు తప్పులు పట్టుట నాయవివేకమె యగును

భువనము లన్నియు చేసి చక్కగను పోషణ చేసెడు స్వామి
ఎవరు చెప్పగల రయ్యా యీశ్వర యిది తప్పది యొప్పనుచు

సురనరకిన్నరపన్నగవిద్యాధరగంధర్వాసురులు
హరి నీజేసిన యాటబొమ్మలే ఆటలాడునది నీవు

నీవాడించెడు విధాన నాడుచు నినుమెప్పించుట గాక
దేవా యన్యవిధంబున నాడుట భావించగనే రాదు

దారితప్పితే ఆటను నీవే తప్పక సరిజేయుదువు
దారితప్పిన పావు రావణుని దండించిన శ్రీరామ

చక్కగనాడెడు పావులు పండును మిక్కిలి సంతోషముగ
ఇక్కడ ఈపావైనను రామా చక్కగ నాడుట గనుము