అంతరింద్రియాన్నీ ఆశ్రయించెను నిన్ను
సుంత వీక్షించి దయజూడ వేల
సుంత వీక్షించి దయజూడ వేల
నామనం బిది నిన్నే నమ్ముకొని యున్నదని
నీ‌మనసున తలచవో నీరజాక్షా
దాని నమ్మకంబునకు దగిన మన్నన చేయ
బూను తలపు నీకేల పుట్టదు రామా
ఇదే నా బుధ్ధి నిన్నే యెంచి చింతించుటను
విదితము గాదన్నట్లు వేదవేద్యుడా
మదినెంచి మన్నించుట మంచిదనుచు తోచదొకో
సదయుడ వగు శ్రీరామచంద్రమూర్తీ
నాయహం బెన్నడో నయమొప్ప జేరిన దిదె
నీయడుగుదమ్ముల నిశ్చయమ్ముగా
నీయడుగుదమ్ముల నిశ్చయమ్ముగా
శ్రేయమెంచి వచ్చెనని జేరదీయ వేలనయా
న్యాయమా రామచంద్ర నారాయణా
చిత్త మిదే వేడుకతో చేరియున్న దాయె నిను
చిత్తగించ వేల దాని శ్రీరాముడా
ఇత్తరి యాదరించు టెంతో యుచితమన్నది
బొత్తిగా తోచదొకో పురుషోత్తముడా
కామెంట్‌లు లేవు:
కామెంట్‌ను పోస్ట్ చేయండి
ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.