రామ రామ భవతారక నీదయ రానీయవయా నేడే
కామితవరదా రానీయవయా ఘనమగు నీదయ నేడే
అరిషడ్వర్గోరగకూటమి నన్నాక్రమించినది రామా
పరమాత్మా యీయురగంబులను పారద్రోలవే రామా
పంచమలంబుల ప్రభావమున నేపతితుడనైతిని రామా
కొంచెమైన నీతలపులేని మూర్ఖుండనైతినో రామా
తాపత్రయమను కుమ్మునబడి నేతహతహలాడుచు రామా
పాపాత్ముడనై చెడిపోతినిరా పరమదయాళో రామా
కుపధవర్తనుల సహవాసముచే కూడనిపనులను రామా
విపరీతముగా చేసితినని నను వెలివేయకుమా రామా
నేర్చిన చదువులు నినుసేవించుట నేర్పనివాయెను రామా
పేర్చిన కృప మన్నించి కావుమని వేడెదనయ్యా రామా
ఇక నీనామస్మరణము మదిలో నెన్నడు మరువను రామా
వికచసరోరుహనేత్ర నీవు నను విడువకుండుమా రామా
