అది చాలదు - ఇది చాలదు - అని నసిగితినా
అది యిమ్మని - ఇది యిమ్మని - అడిగితినా
సదయ నీ యిచ్చయే చక్కగా నాదంటిని
హృదయపూర్వకముగ నటు లంటినిగా
అది గాక నీసన్నిధి యందే నిలిచి యుంటిని
ముదమారగ నన్నేలు మోహనాంగ రామా
వదలను నీనామమును నిదురలో నైన గాని
పెదవులు తదితరములను వెగటనును గాన
చెదరదు నీపైన నీ జీవునకు గల ప్రేముడి
కుదిరిన నీతో నిలుపుకొనరాదా రామా
నీవెట్టుల చేసినను నేను కాదనను నిజము
నీవెయ్యది యిచ్చినను నేను వద్దనను
నీవు నన్నెఱిగినటుల నేను నన్నెఱుగ లేను
నీవే ఆలోచించి నియమించుము రామా