నాకు తెలియును నాకు తెలియును నారాముని మహిమ
లోకములేలే రాముని మహిమ శ్రీకరమగు మహిమ
రాతినైనను నాతిగజేసే రామవిభుని మహిమ
కోతినైనను బ్రహ్మనుజేసే సీతాపతి మహిమ
ప్రీతిమీఱగ భక్తులనేలే వేదవేద్యు మహిమ
సీతాలక్ష్మణసమేతుడైన శ్రీరాముని మహిమ
పరమశివునిచే పొగడిక లందిన పరంతపుని మహిమ
సరసిజాసనుడు సన్నుతిజేసిన జానకీశు మహిమ
పరమభక్తులకు వరముల నిచ్చే పరాత్పరుని మహిమ
కరువలితనయుడు నిరతము కొలిచే ఘనుని దివ్యమహిమ
జగములన్నిటను వ్యాప్తినిబొందిన జగదీశుని మహిమ
నిగమము లన్నియు పొగడుచునుండే నిరంజనుని మహిమ
తగినవిధంబుగ సుజనుల బ్రోచే ధర్మవిభుని మహిమ
సుగతిని మునులకు సొంపుగనిచ్చే శుభప్రధమగు మహిమ