వీనులవిందుగ రామనామమును

వీనులవిందుగ రామనామమును వివిధరాగముల పాడరే

మానవజన్మము నెత్తినందుకు మానక రాముని కొలువరే

దశరథనందన రఘురామా యని తనివితీరగ పిలువరే

దశముఖసంహర దైవరాయ యని యశోవిశాలుని పిలువరే

ఇనకులతిలక జననాయక యని ఎంతోప్రేమగ పిలువరే

మునిజనమోహన మోక్షప్రదా యని ముచ్చటతీరగ పిలువరే

వనజాతేక్షణ పరమాత్మా యని భక్తవరద యని పిలువరే

జనకసుతావర జగదీశ్వర యని ఙ్ఞానగమ్య యని పిలువరే

ఈతని కధికుడు లేనేలేడని యెల్లతావులను చాటుచును

ప్రీతిగ రాముని నామామృతముని భూతలమందున పంచుచును

వివిధతాళముల విరివిగ పాడుచు అవిరళముగ కడు వేడుకతో 

భవతారకమగు భగవన్నామము ప్రజలందరకు పంచుచును

పాడినవారిదె భాగ్యము సుమ్మని పరిపరివిధముల పొంగుచును

వేడుకతో హరిభజనము చేసిన విబుధులదే ఘనభాగ్యమని