హరి నీవాడైతే నదియే చాలు

హరి నీవాడైతే నదియే చాలు తుం
టరులాడు టక్కరిమాటలతో నేమి

యెంచి నిన్ను భక్తుడవని ఎవరైనా పలికితే
పొంచియుండి తుంటరులు పొరిపొరి నవ్వేరు
వించు హరికీర్తనము విబుధవరులు మెచ్చితే
కొంచెపుబుధ్ధుల వారు గుసగుసలాడేరు

హరినీకు దయచూపి యనువుగ పలికించితే
ధరమీద కొందరు నిను తప్పులుపట్టేరు
మరి పెద్దల దారిలోన మానక నీవుండితే
తరచుగా తుంటరులు దారి కడ్డుపడేరు

రామరామ యనుచు నీవు రంజుగా పాడితేను
పామరులది హాస్యములపాలుగా చేసేరు
భూమినున్న కుజనులతో పోట్లాట లెందుకులే
శ్యామసుందరునితోడి సఖ్యమొకటి చాలును