మంచిమాట చెప్పుట మరువకయ్యా

మంచిమాట చెప్పుట మరువకయ్యా నీ

మంచితనము కాక మాకు మరి దిక్కేది

మంచిమాట చెప్పితివి మానక నాదిత్యుల

కొంచెపఱచు రావణుని కూల్చెద నేనని

మంచిదాయె యాగమును మహినేలు రాజున

కంచితమున బిడ్డవై యవతరించి నావు

మంచిమాట చెప్పితివి మార్తాండ సుతుని కా

వించెదను కిష్కింధకు విభునిగ నేనని

మంచిమాట చెప్పితివి మరి విభీషణుని మ

న్నించి లంకేశునిగ నియమించెద నేనని

ఎంచి నీవన్నట్టి యన్ని మంచిమాట లారయ

మంచిమంచి వరములాయె మహి నవ్వారికి

మంచిమాట సెలవీవయ్య మరి కర్మబంధముల

ద్రుంచి మోక్షమిచ్చి మిము రక్షించెద నేనని