రఘువంశజలధిచంద్ర రామచంద్ర

రఘువంశజలధిచంద్ర రామచంద్ర
అఘుమోచక నామొఱ్ఱ లాలకింపరా

పురుషోత్తమ నీపాదాంబుజములే చాలు
నిరతము ముల్లోకములకు శరణము కాగ
శరణమనే లోకములను కరుణను కావ
పరాత్పర నారాయణ పతితపావన

పాదంబులు కాదు నీదు పాదుకలే చాలు
వేదనలను తగ్గించుచు మేదిని నేల
నీదాసుల ఘనతలను నేలను చాట
వేదవేదాంతవేద్య విమలరాఘవ

పాదుకలా నీపావన నామంబే చాలు
ఆదరించి బ్రహ్మపద మైన నొసంగ
నీదయచే తారకమగు నీనామంబు
నాదీనతబాపి ముక్తి నాకిడు గాక