మట్టిబొమ్మ తోలుబొమ్మ మతిలేని మాయబొమ్మ
ఇట్టే దారితప్పితిరుగు నీపిచ్చి నీటిబొమ్మ
చెట్టుమీది కోతివోలె చెంగుచెంగు నెగురుబొమ్మ
పుట్టలోని చెదలవలె పుట్టిచచ్చుచుండు బొమ్మ
మట్టినుండి పుట్టుబొమ్మ మట్టిలోన కలయుబొమ్మ
గట్టిగ పదినాళ్ళకంటె నెట్టలేని వెఱ్ఱిబొమ్మ
సింగారముమీద పిచ్చి చెదిరిపోని చచ్చుబొమ్మ
బంగారమునందు భ్రాంతి వదలలేని భలేబొమ్మ
నింగిమీది కెగురుబొమ్మ నేలమీది కొఱుగుబొమ్మ
భంగపరచు కాలమని భావించగలేని బొమ్మ
ఇట్టి బొమ్మ నొకటిచేసి యిందు నన్నుండ నీవు
పట్టుబట్టి పనిచినావు పరమాత్మా రామచంద్ర
ఇట్టే నిన్ను మరచిపోయి యెగురుచున్న బొమ్మనై
ఎట్టకేలకిపుడు నిన్నే యెంచిపొగులుచుంటి గనుమ
ఇది రామకీర్తనాపరంపరలో 1100వ కీర్తన 18. (అక్టోబర్ 2020, ఆదివారం నాటి 'ఇత డిటువంటి వాడె' అన్నది 1000వ కీర్తన. అంటే ఈవందకీర్తనలు 110రోజుల కాలవ్యవధిలో వచ్చాయన్నమాట.)
రిప్లయితొలగించండిఅంటే మీలో కవితావేశం అంతకంతకూ పెరుగుతోందన్నమాట. అభినందనలు 👏.
రిప్లయితొలగించండిఈ statistics అప్పుడపుడు ఇవ్వటం వెనుక కారణం ముందుముందు ఎవరికైనా పనికిరావచ్చుననే నండీ. ప్రస్తుతం ఇవి ఆట్టే మంది చదువరన్న విషయం అందరికీ తెలిసిందే.
తొలగించండిచాలా బావుంది సర్
రిప్లయితొలగించండిచాలా సంతోష మండీ రామకీర్తనలను చదువుతున్నందుకు.
తొలగించండి