శ్రీరామ శ్రీరామ శ్రీరామ యనువాడు

శ్రీరామ శ్రీరామ శ్రీరామ యనువాడు 

  చెడిపోడు చెడిపోడు చెడిపోడు

శ్రీరామ యనిగూడ చెడిపోతి ననువాడు

  సృష్టిలో నిందాకనే లేడు

శ్రీరామ శ్రీరామ యనుచున్న నాసాధ్వి

   శ్రీరాముని గాంచి సిధ్ధిపొందె

శ్రీరామ శ్రీరామ శ్రీరామ యని పక్షి

  చెందెనే మోక్షమును సూటిగాను

శ్రీరామ నామమును చెవుల వినిన పక్షి

  చెందెనే స్వస్థతను తక్షణమ్ము

శ్రీరామ చింతనమె శ్రీరామ దర్శనమె

  శ్రీరామ శ్రవణమె చాలు కనుక

శ్రీరామ శరణమని వేడిన వాయసము

  చెందెనే శీఘ్రముగ ప్రాణభిక్ష

శ్రీరామ శరణమని వేడిన కపిరాజు

  చెందెనే రాజ్యమును శీఘ్రముగను

శ్రీరామ శరణమని చేరి రావణభ్రాత

  చెందె నభయము రాజ్యసిధ్ధి గూడ

శ్రీరాముని శరణుజొచ్చు వా రందరకు

  సిరు లభయములను కీర్తి తిరము కనుక

శ్రీరామ శ్రీరామ శ్రీరామ యని భజన

  చేయుటకు మించినది సుఖము లేదు

శ్రీరామ శ్రీరామ శ్రీరామ యని సతము

  చింతించు జీవి కిక చింత లేదు

శ్రీరామ శ్రీరామ శ్రీరామ యను వాని

  చెందకుండెడు నట్టి సిధ్ధి లేదు

శ్రీరామ శ్రీరామ శ్రీరామ యని పల్కు

  జీవికిక గర్భనరకంబు లేదు