గొప్పలు కుప్పలుతిప్పలు

గొప్పలు కుప్పలుతిప్పలు కాగా 

    గొప్పగ నుండర దేవుడా మా
తిప్పలు చూడర తప్పులెంచకుర 

    దేవుడా ఓ దేవుడా

ఊళ్ళకుఊళ్ళే మెక్కేవాళ్ళని 

    కుళ్ళబొడవరా దేవుడా మా
కళ్ళకు గంతలుకట్టే వాళ్ళని 

    కనికరించకు దేవుడా

మంచికి అడ్డం వచ్చే వాళ్ళని 

    మన్నించకురా దేవుడా నీ
మంచితనమునే తిట్టేవాళ్ళకు 

    మంచిచేయకు దేవుడా

తప్పుడుమనుషులు గద్దెలకెక్కితె 

   తన్నిపంపరా దేవుడా మా
కెప్పటికప్పుడు తోడుగ నీడగ 

    తప్పక నుండర దేవుడా

వంచనచేసే వాళ్ళ నెవ్వరిని 

    వదిలిపెట్టకుర దేవుడా నీ
పంచనచేరిన మాకు నిత్యమును 

    వరములీయరా దేవుడా

రామా రారా అంటే వేగమె 

    రక్షణ నిచ్చే దేవుడా నీ
నామాన్నేవెక్కిరించే వారు 

    నాశన మగుదురు దేవుడా

రామా రామా రామా అంటూ 

    ప్రాణప్రదముగ దేవుడా నీ
నామాన్నే నమ్ముకొన్నామయ్యా 

    మామాట మరువకు దేవుడా