సరసమైన నామం చక్కని నామం
పరమాత్ముని నామం పావననామం
పరమమధుర మైయున్నది భగవన్నామం
పరమసులభ మైయున్నది భగవన్నామం
పరమ సుఖద మైయున్నది భగవన్నామం
పరమపదము నొసంగునది భగవన్నామం
ముదమారగ ప్రేమించు ముముక్షువులను
వదలకుండ రక్షించును వదలకండి
నిదుర నైన మీరెన్నడు వదలకండి
వదలకండి మధురమైన భగవన్నామం
జగముల రక్షించునది భగవన్నామం
నిగమసార మైయున్నది భగవన్నామం
భగవంతున కబేధము భగవన్నామం
జగదీశ్వరుడైన రామచంద్రుని నామం
