రామా శ్రీరామా జయరామా రఘురామా నీ
నామము మరువగ లేము గుణధామా
పరదైవతములను భావించబోమయ్య
నరనాథ నిన్నెడద నమ్మినామయ్య
సిరులకై మేము వెంపరలాడ మయ్యా
పరమాత్ముడా మమ్ము కరుణించవయ్యా
ధర్మస్వరూపుడవు దయగల స్వామివి
నిర్మలచరితుడవు నిగమవేద్యుడవు
నిర్మోహులుగ మమ్ము నిలబెట్టవయ్యా
కర్మబంధము లూడ్చి కరుణించవయ్యా
మేము నీదాసులము మిక్కిలి భక్తులము
కామితములు లేవు కైవల్యమే చాలు
పామరరత్వము నుడిపి భవము లేకుండ
మామీద దయచూప మది నెంచవయ్యా
