ఎవరు పొగడితే నేమి యెవరు తిట్టితే నేమి
అవధరించి నీవు మెచ్చే వదిచాలు నాకు
పాడమనెడు వాడ వీవు పాడుటయే నావంతు
పాటను సృష్టింతు వీవు పాడి వినిపింతు నేను
పాట నీది భావము నీది పలుకుగొంతుకే నాది
పాటలోని పదములు నీవి పలుకు భాగ్యమే నాది
తనువు నీవిచ్చిన దాయె దాని గొప్ప నీదేగా
మనసు నీచిచ్చిన దాయె మరి యదియు నీదేగా
వినుము రసన నీవిచ్చినదే వినిపించు పాట నీదే
కనుగొన నీ యుపకరణముగా నుండు భాగ్యము నాది
ఎన్ని జన్మంబుల నుండి యిట్లు నడచుచున్నదో
సన్నుతాంగ రామచంద్ర చాలదా యీభాగ్యమే
నిన్ను గూర్చి కలుగు పాట నిక్కమైన మంత్రమని
పన్నుగ లోనెఱిగి నేను పరవశించి పాడగా
మాస్టారూ!
రిప్లయితొలగించండి"తనువు నీవిచ్చిన దాయె దాని గొప్ప నీదేగా
మనసు నీచిచ్చిన దాయె మరి యదియు నీదేగా"
అనడానికి బదులు
"తనువు నీవిచ్చిన దాయె దాని గొప్పయు నీదే
మనసు నీచిచ్చిన దాయె మరి యదియు నీదే"
అనడం ఇంకొంచెం బాగుంటుంది కదా!
మిగిలిన రెండు చరణాల చివరన ఉన్న "దే,ది" అనేవాటితో ఇక్కడి "గా"
అతకడం లేదనిపిస్తుంది నాకు.
హరిబాబు గారూ, ఈ కీర్తనలో అంత్యప్రాస గురించిన ఆలోచన లేదు కదండీ. మిగిలిన చరణాలను కూడా చూడండి. (ఉత్తరార్థం పన్నెండు మాత్రలుగా ఉండాలి కాబట్టి ఈ 'గా' అన్నది పడింది అనుకోవచ్చును మీరు. ఒకమాత్ర అటూ ఇటూ ఐనా గానసౌలభ్యం చెడదు కాని రెండుమాత్రలు కత్తెరవేస్తే కొంచెంగా ఇబ్బంది రావచ్చును. నిజానికి వ్రాసేటప్పుడు ఈతూనికలూ కొలతలూ చెక్ చేసుకుంటూ వ్రాయలేదనుకోండి, అది వేరే విషయం. )
తొలగించండిమాత్రా ఛందస్సు వాడారా?
తొలగించండిఅది నాకు తెలీదు లెండి!
పాటలా పాడి చూస్తుంటే నాకు అనిపించిన ఇబ్బందిని చెప్పాను, అంతే!సంగీతం తెలిసినవాణ్ణి కూడా కాదు.వూరికే కూనిరాగం తియ్యలనుకున్నాను.అక్కడ నట్లు కొడుతున్నది.
విద్వాంసులకి ఇబ్బంది ఉండకపోవచ్చును.
పాటలకు మాత్రా చందస్సులే కదండీ వాడేదీ! ఐతే ఇక్కడ పాటలకు ఒక సౌలభ్యం ఉన్నది. ఒక ఖండంలో తాళానికి ఎక్కడన్నా ఒకటి రెండు మాత్రలు హెచ్చుతగ్గులైతే సరిపెట్టుకోవచ్చును. ఉదాహరణకు ముకుంద అని ఉందనుకోండి ఇది నాలుగు మాత్రలు కాని సందర్భాన్ని బట్టి ముకుందా అని ఐదుమాత్రలు చేయవచ్చును. ముకుం..దా.. అని మరికొన్ని మాత్రలు అదనంగా లాగించవచ్చును. బాణికట్టేవారు ఎలా శ్రుతిసుభంగంగా ఉందో చూసుకొంటారు. ఐతే మరీ ఎక్కువగా సరిపెట్టుకోవటాలు అన్నిసార్లూ బాగుండక పోవచ్చును - ముఖ్యంగా ఒకే‌తాళఖండంలో. అలాగే తాళం ఎక్కడ విరుగుతోందో అక్కడ మాటమధ్యలో ఉండినపక్షంలో అంత బాగుండకపోవచ్చును. అలాగే పాదాంతంలో (పల్లవి ఐనా, చరణం ఐనా) అదనంగా తాళంలో ఎంతైనా పూరించుకోవచ్చును సాధారణంగా. ఇవన్నీ బాణీని ఏర్పరచటంలో ఉండే సాధారణసాధకబాధకాలు.
తొలగించండి