రాముం డొకడే నమ్మదగినవాడు

నమ్మండీ శ్రీరాముం డొకడే నమ్మదగినవాడు
మిమ్మును నన్నును మోసము చేయని మేలిగుణమువాడు

భాసమానశుభలక్షణయుతుడు పరమశుభంకరుడు
వాసవాదిసురనాయకవినుతుడు బ్రహ్మాండాధిపుడు
వాసిగ భక్తుల నేలెడు వాడీ పట్టాభిరాముడు
దాసుల నెప్పుడు దయతోజూచే దశరథనందనుడు

మనసిజమోహన మూర్తి మహాత్ముడు మానవనాయకుడు
సనకాదికమునిజనసన్నుతుడు దనుజగణాంతకుడు
జనకసుతాహృదయేశ్వరుడు హరసన్నుతుడు ఘనుడు
అనిశము సద్భక్తాళికివరముల నందించెడు వాడు

మరియాదాపురుషోత్తముడు హరి మంగళదాయకుడు
ధరపై వెలసిన కమలాపతి హరి ధర్మవివర్ధనుడు
శరణాగతజనసంరక్షకుడు సర్వార్ధప్రదుడు
పరమానందప్రదాయకుడు హరి పరమార్ధప్రదుడు