జయ జయ జయ కరుణారససాగరా రామా

జయ జయ జయ కరుణారససాగరా రామా రిపు

క్షయకరములు నీశరములు సార్వభౌమా

ఆశరములు తాటకాపటాటోపము నణచె

ఆశరములు గాధేయుని యాగంబును కాచె

ఆశరములు ఖరదూషణలను దుష్టుల గొట్టె

ఆశరములు వారసైన్య మంతటిని మ్రింగె

ఆశరముల నొకటి మారీచాధముని జంపె

ఆశరముల నేడు తాళ్ళ నణచి చెలగె నొకటి

ఆశరముల నొకటి వాలి నంతము కావించె

ఆశరములు దెబ్బ కుదధి యంజలి ఘటియించె

ఆశరములు కుంభకర్ణు నని ద్రెళ్ళగ వేసె

ఆశరములు త్రెంచె రావణాసురుని శిరములు

ఆశరములు నొకటి రావణాంతకమై నిక్కె

దాశరథీ నీశరములు ధర్మంబును నిలిపు