మ్రోగించరా దివ్యరాగాల మురళిని

మ్రోగించరా దివ్యరాగాల మురళిని 

సాగించరా హాయిసంతర్పణమును

 

కరముల నీవూన కడుపొంగి యానంద

భరితమై వేణువిటు పాడనేర్చును కాని

చిరువెదురు ముక్కలో చిందునా సుధలనే

మురళీధరా పాట  మొదలుకానీయరా

మురళి తా జేసిన పుణ్యమెట్టిదో కాని

తరచు నీపెదవుల దాకి పరవశమందు 

మురళి పాటలోని భూరిమాధుర్యము

హరి నీదు పెదవుల నంటిన పుణ్యమే 

జగమునే మురిపించు చక్కని నీపాట

జగమునే మరపించు చక్కని నీపాట

నగధరా వినుట యేనాటి పుణ్యమొ మాకు

జగదీశ రేయెల్ల సాగనీ నీపాట