14, జులై 2022, గురువారం

రామ రామ యనవే

రామ రామ యనవే రసనా రసనా  శ్రీ‌రఘు
రామునింక పొగడవే రసనా రసనా

ఏడేడు జగములను వేడుకతో రసనా
ఆడించెడు రమాపతి వాడేనే రసనా
వాడి కంటె నిక గొప్పవాడెవడే రసనా
వేడుకతో నోరారా పిలువగదే రసనా

నారాయణుని వేయి నామములను రసనా
శ్రీరామనామమే శ్రేష్ఠమనుచు రసనా
గౌరీపతి పలికెనే గొప్పగాను రసనా
నోరారా రామా యని నుడువగదే రసనా

శ్రీరామా యన్నచాలు జీవి నింక రసనా
చేరదీసి శ్రీరాముడె చింతదీర్చు రసనా
ఆరాముని యాశ్రయించి హాయిగాను రసనా
చేరవచ్చు మోక్షపురికి శీఘ్రముగా రసనా