రాముని నమ్మితే రాని దేమున్నది

రాముని నమ్మితే రాని దేమున్నది ఆ

కాముని నమ్మితే కడ కేమున్నది

రాముని నమ్మితివా ప్రసాదించు సంపదలు

కాముని నమ్మితివా కబళించును నీసిరులు

రాముని నమ్మితివా ప్రసాదించు వరములు

కాముని నమ్మితివా కలిగించు వికారములు

రాముని నమ్మువారు రాజ్యములను పొందినారు

కాముని నమ్మువారు ఘనత పొందలేరు భువిని

రాముని నమ్మి యొకడు బ్రహ్మపదము పొందినాడు

కాముని బ్రహ్మవంశఘనుడు నమ్మి చెడినాడు

రాముని నమ్మి చెడడు భూమిపైన నెవ్వడును

కాముని నమ్మి సుఖము గాంచడే మానవుడును

రాముని నమ్మి మోక్షగామి యగును ముముక్షువు

కాముని నమ్మి నరకగామి యగును పామరుడు