శ్రీరాముని దయయుండ

శ్రీరాముని దయయుండ చింతలేల నోట

శ్రీరాముని నామ ముండ చింతలేల

నరులను నమ్ముకొన్న నానాచింతలు కాని

హరిని మనసార నమ్మినప్పు డుండునా

పరుల సేవలోన పలుబాధలును చింతలగు

హరిసేవలోన బాధ లసలుండునా

ధనముల వెంటబడిన తగులును చింతలు కాని

మనసు హరిధ్యానమగ్న మైన తలుగునా

వనజాక్షుల సేవలోన బాధలగు చింతలగు

వనజాక్షుని సేవలోన బాధలుండునా

హరిభక్తి లేనివారి కనేకములు చింతలగు

హరిభక్తుల కెందు చింతలన్నవి కలవు

హరిభక్తుల మంచిచెడుగు లరయుచు హరియుండ

మరి చింత యనునట్టి మాట యెక్కడిది