26, ఫిబ్రవరి 2020, బుధవారం
చక్కనివాడ వైన జానకీరామ
చక్కనివాడ వైన జానకీరామ నీకు
మ్రొక్కేము మునిజనమోహన రామ
సకలలోకరక్షక సాకేతపురవిహార
వికచకమలదళేక్షణ ప్రియభాషణ
వికటవిరాధాధినిధన వినిర్జితపౌలస్త్య
ముకుళిత హస్తములతో మ్రొక్కేమయ్యా
యోగీశ్వరేశ్వర యోగిహృత్పురవిహార
వాగీశప్రముఖవినుతభండన రామా
సాగరగర్వాపహార నాగేంద్రపర్యంక
సాగి మ్రొక్కేము నీకు సర్వేశ్వరా
లోకేశ నారాయణ వైకుంఠపురవిహార
పాకారిప్రముఖసంప్రార్థిత రామా
శ్రీకరకరుణాలవాల సీతామనోహర
మాకు ప్రసన్నుడవు కమ్ము మా దేవుడా