రామాష్టకం

 

రామనామం బుండ మన నోట 

రామభక్తులు కలుగ మన తోడు 

రామచంద్రుం డుండ మన పాల 

ఏమి కావలె నింక జనులార 1

రామసేవకు నురుకు తనువుండ

రామతత్త్వము విదితమై యుండ

రామచంద్రుడు హృదయమున నిండ

ఏమి కావలె నింక జనులార 2

రామచంద్రుడు బంధువై యుండ 

రామచంద్రుడు మిత్రుడై యుండ 

రామచంద్రుడు గురువుగా నుండ 

ఏమి కావలె నింక జనులార 3

రామకీర్తన వినెడు చెవులుండ 

రామకీర్తన పాడు నోరుండ 

రామకీర్తన చేయు మనసుండ 

ఏమి కావలె నింక జనులార 4

రాముడే మన సంపదగ నుండ 

రాముడే మన భాగ్యమై యుండ 

రాముడే సర్వస్వమై యుండ

ఏమి కావలె నింక జనులార 5

రామునే సేవించు తనువుండ 

రామునే కామించు మనసుండ

రాముడే మన నాథుడై యుండ 

ఏమి కావలె నింక జనులార 6

రామదర్శన కాంక్ష మనకుండ 

రామదర్శన ప్రాప్తి మనకుండ 

రామదర్శన మెపుడు మనకుండ 

ఏమి కావలె నింక జనులార 7

రాముడే హరి యనుచు లోనెఱిగి

రాముడే శివు డనుచు లోనెఱిగి

రామునే లలితమ్మగా నెఱిగి

ఏ మెఱుగవలె మనము జనులార 8

శ్యామలరాయ ప్రణీతము

రామాష్టక మఖిలసుజనరంజక మగుచున్

కామితఫలదం బగుచున్

భూమిజనుల కొసగు గాక భూరిశుభంబుల్