రామ రామ రామ యనర

రామ రామ రామ యనర రాముని సేవించరా
ఈమంచి మాట కన్న యేమి చెప్పేదిరా

సకలలోకములకు హరి జనకుడని తెలియరా
అకళంగ భక్తినతని యర్చించుట మేలురా
వికచాబ్జనయను డతడె వేడుకతో రాముడై
సకలసుగుణభూషణుడై సంభవించినాడురా

మునులు రామచంద్రుని ఘనత నెఱిగినారురా

ఘనులు బ్రహ్మశివులు వాని వినుతి చేసినారురా

మునుపు భక్తవరులు కొలిచి ముక్తి పొందినారురా

తనివారా వాని గొలిచి ధన్యుడవై చెలగరా

రామని దయచేత పాపరాశి నశియించునురా
రామభక్తి కలవారికి రాని మేలు లేదురా
రాముడే వారియోగక్షేమంబుల నరయురా
భూమి మీద వారు మరల పుట్టెడుపని లేదురా