రామ నిను నమ్ముకొని

రామ నిను నమ్ముకొని మేముంటి మీభువిని

మామాట లాలించు మనుజులెవ్వరు నేడు

నీకన్న రక్షకుడు లోకాన లేడనుచు

లోకులకు బోధింప లేకుంటి మీనాడు

ఏకొద్దిమందియో గాక సర్వులు నేడు

లోకవిద్యలు నేర్చి నీకు దూరం బైరి

తనివార నీనామమును పలుక బోరాయె

నిను గూర్చి తెలిపితే మనసార వినరాయె

కనుగొనక నీసత్యకథ నించుకేనియును

మునుకొని ఆరావణుని పొగడు చుంద్రు

రానురా నిచట శ్రీరామ యన తప్పాయె

కానిపలుకులు పలుకు ఘనులదే యొప్పాయె

పూని మేమెంతగా పురుషోత్తమా భువిని

నీ నిజము తెలిపినను నేడు చెల్లకపోయె