మానవులారా అనందం

మానవులారా అనందం పరమానంద మదే కాదా

దినదినమును హరిసంకీర్తనమును తీయగ చేయుట అనందం 
దినదినమును నారాయణునకునై పనులుచేయుట అనందం 
దినదినమును హరిచరితామృతమును మనసా చదువుట అనందం 
దినదినమును హరిచింతన మందున తేలియాటట అనందం 

పదుగురికి హరి పారమ్యంబును విదితము చేయుట అనందం 
పదుగురి మధ్యన నారాయణుని ప్రస్తుతించుట అనందం 
పదుగురు కలిసి హరికీర్తనలను పాడుట మిక్కిలి అనందం 
పదుగురు కలిసి హరిసేవలలో పాలుగొనుటయే అనందం 

అన్నితావులను హరిపరమాత్ముని యరయగలుగుట అనందం 
అన్నిపనులను హరికంకితముగ యాచరించుట అనందం 
అన్నివేళలను హరేరామయని యరచుచుంట అనందం 
తిన్నగ వైకుంఠంబున హాయిగ దేవుని కొలుచుట అనందం