శివపూజ జేసేవు సీతమ్మా

శివపూజ జేసేవు సీతమ్మా ఆ
శివు డెవరో హరి యెవరో సీతమ్మా

హరికొఱకు తపించిన యానాటి వేదవతివి
హరికి యిల్లాలివై హరుని పూజించెదవు
హరిభక్తు రాలవును హరభక్తు రాలవును
తరుణిరో విశదించ దగునమ్మ చెప్పవే

వెన్నుడే శివుడని వెన్నుడే రుద్రుడని
వెన్నుడే స్థాణుడని వెన్నుడే శంభుడని
వెన్నుడే యీశ్వరుడని వివరంబుగా
నెన్న లేని వారికే యీ సందియము

వెన్నుడు శివపూజ చేయు వేయినామాలతో
వెన్నుని ధ్యానించు సర్వవేళలను శివుడు
చిన్నమెత్తు బేధమును శివకేశవుల కేది
పన్నుగ నిది యెఱిగిన వారికిక శంకేది