నిన్నే నమ్ముకొంటి నయ్య నిజము

నిన్నే నమ్ముకొంటి నయ్య నిజము శ్రీరామ
కన్నతండ్రి నన్నేల కాపాడవు రామ

భయమాయెను చెప్పరాని బాధల వలన
రయమున నను కాపాడ రావేల రామ
దయామయబిరుదాంకిత దశరథ రామ
జయశీల శుభచరిత జానకిరామ

దురుసులాడు వారి పుల్లవిరుపుల వలన
కరము నొచ్చు నన్నేల కావవు రామ
కరుణాకరబిరుదాంకిత నరపతి రామ
శరణాగతుల బ్రోచు జానకిరామ

తమకించి యిలకు వచ్చి తత్తరపడుచు
కుములు న న్నేలవేల గోవింద రామ
సమరాంగణసార్వభౌమ సద్గుణధామ
సమానాధికులు లేని జానకిరామ