సోదరుల పోరు లోన జొరబడినావు

సోదరుల పోరు లోన జొరబడినావు
మేదినిపై ధర్మమే మెఱయించినావు

వాలి సుగ్రీవు మెడపట్టి గెంటి వైచి
గాలించి చంపగా గమకించు వేళ
కోల నేసి వాలిని నీలమేఘశ్యామ
పాలించి సుగ్రీవు  ప్రభువు జేసినావు

నీతిచెప్ప రావణుడు నిందించి వెడలింప
ఖ్యాతిగల విభీషణు డాతురుడై చేరగ
ప్రీతిమై చేరదీసి వీరుడా రాముడా
ఆతనికే లంక నుపాయనము చేసినావు

కౌరవులు పాండవుల కడగండ్లు పెట్ట
పోరు తప్పనట్టి వేళ పోయి నల్లనయ్య
చేరి పాండవులతో కౌరవుల నణగించి
ధారుణికి భారమును తగ్గించినావు