హరేరామ హరేకృష్ణ యనక ముక్తి లేదు
శరీరధారులార చక్కగా తెలియుడు
ఘనమైన కులము నందు కలుగుగాక మీజన్మము
ధనధనేతరములు చాల మొనయు గాక
ఘనమైన ప్రభుత కలిగి గర్వమంద వచ్చు గాక
పనివడి పదిమంది పొగడ వచ్చు కాక
వనజాక్షులు మిమ్ము మెచ్చి వచ్చిన రావచ్చు గాక
కనని వినని భోగంబులు కలుగు గాక
వినయముతో జనులు మిమ్ము వేడుచుందురు కాక
ఘనమగు తేజంబు మీకు కలుగు గాక
చాల దానధర్మములను సలిపిన సలుపుదురు గాక
నేలమీద మీకు పేరు నిలుచు గాక
చాల పుణ్యశీలురగుచు సంతసింతురు గాక
కాలమున మేలు గతులు కలుగు గాక
