పిల్లంగోవి చేతబట్టి పిల్లి వస్తుందా

పిల్లంగోవి చేతబట్టి పిల్లి వస్తుందా ఆ
పిల్లి నెత్తిమీద నెమలిఫించ ముంటుందా

పిల్లైతేను పాలుతాగి వెళ్ళిపోతుందే ఈ
పిల్లి వెన్నదుత్తలన్ని కొల్లగొడుతుందే
పిల్లైతేను ఉట్లజోలి కెల్లాపోతుందే ఈ
నల్లపిల్లి నందునింటి పిల్లే నోయమ్మా

పిల్లైతేను తానొంటిగ మెల్లగవచ్చేనే ఈ
పిల్లి పెద్దదండు తెచ్చి యిల్లు దూరేనే
పిల్లైతేను కాపుగాచి వెళ్ళగొట్టేమే వేయి
కళ్ళున్న ఈపిల్లిరాక కానలేమమ్మా

పిల్లైతే వంటింటిసిరి కొల్లగొట్టేనే ఈ
పిల్లి వచ్చిపోతే సిరులు వెల్లివిరియునే
పిల్లికాదు పిల్లికాదు గొల్లపల్లెనే ఇది
చల్లగ కాచే చక్కని శ్రావణమేఘమే