దయామయుడ వని వింటిని

దయామయుడ వని వింటిని దాశరథీ శరణంటిని

దయజూపు మని యంటిని దరిజేరి నిలుచుంటిని

జగదీశాహరి మృదుతరభాషా జనకసుపుత్రీ హృదయేశా

నిగమాగమసంవేద్యవి‌లాసా నిరుపమదివ్యసుగుణభూషా

పగవారలకును నీవు నరేశా తగునని దయజూపెద వీశా

పగవాడను కాను కదా నాపై పరపుము నీకృప శ్రీశా

సకలదేవతార్చితపద శ్రీహరి వికచోత్పలశుభనేత్ర హరి

మకరిని ద్రుంచి కరినేలిన హరి మంకురాక్షసుల ద్రుంచు హరి

సకలము నెఱిగిన సర్వేశ హరి సర్వబుధుల కాపాడు హరి

సకలశుభంబుల నొసగి ప్రోచు హరి జానకీశ శ్రీరామ హరి

నిన్ను దక్క నే నొరుల స్మరింపను నీనామమునే నుడివెదను

నిన్ను దక్క నే నొరులను కొలువను నిన్నే నిత్యము కొలిచెదను

నిన్ను దక్క నే నొరులను వేడను నిన్నే మనసా వేడెదను

సన్నుతాంగ శ్రీరామచంద్ర నను సరగున బ్రోవగ నడిగెదను