నేటి హరిబాబు గారి వ్యాఖ్య నొప్పించింది. దానికి నా జవాబు చాలా పెద్దగా ఉందని బ్లాగరు వాడి నిరాకరణ కారణంగా విడిగా ఒకటపాగా వేయవలసి వచ్చింది.
ఈ archive.org మీకొక పెద్ద అడవిలా కనబడితే అందులో అశ్చర్యం లేదు. అక్కడ చాలా రకాల సరంజామా ఉంది. ముఖ్యంగా పుస్తకాలు కొల్లలు.
నేనేమీ వెక్కిరింత కామెంట్లు చేయలేదండీ. ఇతిహాసాలు అంటే సంప్రదాయంగా చెప్పేవి రామాయణ భారతాలు మాత్రమే, మీరు పెంచుతానంటే శుభం అన్నాను. దానిలో వెక్కిరింత ఏమీ లేదు. మీరు రెండును మూడు చేస్తున్నారు. కొన్నాళ్ళకు మరికొన్నింటిని విజ్ణులు జత చేయవచ్చును. అలా జరుగవలసి ఉంటే కానివ్వండి అన్నానంతే.
మీకొక్కరికే బ్లాగులో కనబడటానికి కూడా అంతగా వీలు లేని అరిజెంటు పనులు ఉన్నాయా? అని కోప్పడుతున్నారు. మా శ్రీమతి ఆరోగ్యరీత్యా నాకు తీరటం లేదండీ. గత కొద్దినెలలుగా పరిస్థితి బాగులేదు. జూలైనెలలో ఐతే ప్రతిరోజూ హాస్పిటల్ దర్శనం జరిగింది. ఒక ప్రక్కన కిడ్నీసమస్యకు (ESRD అంటారు) డయాలసిస్, తత్సంబంధిత బాధలతో తరచుగా అర్ధరాత్రి అపరాత్రి అని లేకుండా ఎమర్జెన్సీకి పరుగులు పెట్టటం జరుగుతోంది . ఆబాధలు అటుంచి కళ్ళసమస్యలు కారణంగా ఎల్.వి.ప్రసాద్ ఆస్పత్రికి పదేపదే వెళ్ళటం - కుడికంటికి అపరేషన్ మరొక హడావుడి. మాయిల్లు ఒక మినీ హాస్పిటల్ లాగా ఉంది - ఇంటినిండా మందులూ, మెడికల్ ఎక్విప్‌మెంట్ ,మెడికల్ ఫైల్స్ - వగైరాతో నిండిపోయి ఉంది. ఇంటిని సర్దుకుందుకు కూడా మాకు తీరికా ఓపికా ఉండటం లేదు - ఘోరంగా ఉంది. గత మార్చి నుండి ఇప్పటివరకూ నేను నిద్రపోయిన రాత్రి అంటూ ఏదీ లేదు. ఈమాటలో అతిశయోక్తి ఏమీ లేదు. నమ్మటమో నమ్మకపోవటమో మీయిష్టం. దానితో నా ఆరోగ్యం కూడా బాగానే దెబ్బతిన్నది. ఒకసారి నేనూ ఎమర్జెన్సీలో చేరవలసి వచ్చింది పది రోజుల క్రిందట. ఆదరిమిలా బోలెడు టెష్టులూ డాక్టర్ల చుట్టూ ఎలాగో అలా సందుచూసుకొని నేనూ తిరగటమూ జరిగింది. ఇంకా జరుగుతోంది. ఇంత గందరగోళపరిస్థితుల్లోనూ ఇంట్లో ఉన్నది ఇద్దరమే కాబట్టి మేమే అన్నీ చూసుకోవాలి. ఈమధ్యకాలంలో ముఖ్యమైన శుభాశుభసందర్భాల్లో ఇంటిపెద్దలుగా హాజరు కావలసి ఉన్నా మేమిద్దరమూ వెళ్ళలేకపోవటమూ జరిగింది - కొందరు పైకి అనకపోయినా నొచ్చుకోవటమూ తటస్థించి ఉండవచ్చును. ఎవరి సమస్యలు వారికి ఉంటాయి. నా ఒక్కడికే ఇన్ని సమస్యలు అనుకోవటం లేదండీ. ఇదంతా వ్రాయవలసి వచ్చినది మీరు నిలదీయటం కారణంగానే తప్ప మరొక కారణం ఏదీ లేదు.
దీర్థ చర్చలపైన ఆసక్తి లేకపోవటానికి నాకారణాలు నాకున్నాయి. నాది బాధ్యతారాహిత్యం అని మీరు అనుకుంటే నేనేమీ చేయలేను. అవలి వారిలో మీరు కాకపోయినా కొందరు సాగతీత చర్చలకు దిగుతుంటే నేనున్న పరిస్థితుల్లో అనంతగా మాట్లాడుతూ కూర్చోవటానికి నాకు సావకాశం లేదు కదా.
సమాచారం ఇచ్చే పధ్ధతి ఇదేనా? అని నిలదీస్తున్నారు. ఫలాని పుస్తకం ఫలానిచోట దొరుకుతుంది అని చెప్పినప్పుడు అది సరైన పధ్ధతి ఎలా కాకపోతుంది? తప్పకుండా సరైన పధ్ధతే అనుకుంటాను. ఐతే, మీకు ఆ archive.org సైటులో వెదికే పధ్ధతి కూడా చెప్పవలసి ఉంటుదని నేను ఊహించలేకపోయాను. అందులోనూ మీరు సాఫ్ట్‌వేర్ పని చెస్తున్నారు కదా, మీరే ఇబ్బంది పడతారని ఊహించలేకపోయాను. మన్నించండి.
సరే, అక్కడ వెదికే పధ్దతి కూడా చెబుతాను. మరికొందరికి కూడా ఉపయోగించవచ్చును. మీరు archive.org సైట్ తెరచి చూస్తే ఆపేజీలో search box ఒకటి కనిపిస్తుంది. అందులో మీరు "తత్త్వ కథనము" (please type without these double quotes) అని టైప్ చేస్తే వారణాసి సుబ్రహ్మణ్య శాస్త్రి గారి పుస్తకాలు కనిపిస్తాయి. మీకు కావలసిన పుస్తకం పైన క్లిక్ చేస్తే ఆ పుస్తకం తాలూకు పేజీ తెరచుకొని అందులో DOWNLOAD OPTIONS కూడా కుడివైపున కనిపిస్తాయి. అక్కడ PDF అన్న దానిపై మరలా క్లిక్ చేయండి. మీకు ఆ పుస్తకం PDF మీ బ్రౌజర్ లోనే తెరచుకుంటుంది. అలా తెరచుకున్న పుస్తకం పేజీలో మీకు Download బటన్ కూడా కనిపిస్తుంది. మీరు పుస్తకాన్ని బ్రౌజర్ నుండీ చదువుకోవచ్చును లేదా డౌన్‌లోడ్ చేసుకొని దాచుకోవచ్చును. మీ వీలును బట్టీ అవసరాన్ని బట్టీ చేయవచ్చును. మీరు search box లోపల టైప్ చేసిన దానిని బట్టి పుస్తకాలు కనిపించటం ఉంటుంది. కొంచెం ఓపిక చేసుకొని రకరకాల search keys వాడి చాలా పుస్తకాలనే వెదకి పట్టుకోవచ్చును. "భారతము" అని దెదికితే 55 పుస్తకాలు కనిపించాయి నాకు. అలాగే "శతకము" అని వెదికితే 394 కనిపించాయి! ఇలా మీకు తోచిన అవసరమైన వెదుకులాట అన్నమాట.
నేను విడిగా పుస్తకం తాలూకు లింక్ అక్కడి నుండి ఇవ్వక పోవటానికి కారణం ఎక్కువమందికి ఈపుస్తకం మిగిలిన భాగాలూ అవసరం పడవచ్చును లేదా అక్కడ ఉన్న అనేక ఇతరగ్రంథాలూ ఆసక్తి కలిగించవచ్చును అని తలచి. అందులో బాధ్యత ఉన్నదో బాధ్యతారాహిత్యం ఉన్నదో మీరూ ఇతర పాఠకోత్తములూ ఎలా అనుకుంటే అలా.
మీరు నిలదీసి మాట్లాడుతున్న విధానం చూస్తే, ఐతే 24 x 7 బ్లాగులో మాట్లాడటానికి సంసిధ్ధంగా ఉండండి - లేకపోతే బ్లాగుల్లోంచి వెళ్ళిపోండి. అన్నట్లుగా ఉంది. ఎవరికీ నిజంగా 24 x 7 సమాధానాలు చెబుతూ వాదనలకు సిధ్ధంగా ఉండటం కుదరదనే నా ఉద్దేశం అండీ.
మీరు అరవిందుల వారి సావిత్రి గ్రంథం చదివారా? ఆ పుస్తకం చాలా పెద్ద గ్రంథం. అంత పెద్ద పుస్తకం చివరన ఎంత మితంగా ఆయన ప్రశ్నోత్తరాలు జతపరచారో గమనించారా? అటువంటిది మనం ప్రతి ఒక్క పేజీ లేదా పేజీన్నర టపాకు పది పేజీల చర్చావేదికను నిర్వహించటం అంత అవవరమా? సమంజసమా అన్నది కొంచెం ఆలోచించండి.
బాధ్యతారాహిత్యం చాలా పెద్దమాట. అటువంటి మాటలు వాడేటప్పుడు ఎవరైనా చాలా బాధ్యతగా ఒకటికి పదిసార్లు ఆలోచించి మరీ వాడటం బాగుంటుందని నా అభిప్రాయం. మిమ్మల్ని కాని మరెవరిని కాని వ్రేలెత్తి చూపటం నా ఉద్దేశం కాదు. కాని ఒక్కొక్కసారి మనం అలవోకగా వాడిన మాటలు ఆవలి వాళ్ళకు రాళ్ళల్లా తగిలే అవకాశం ఉంటుందని మనందరం కొంచెం గమనికగా ఉండవలసిన అవసరం ఉందని చెబుతున్నానంతే.
కామెంట్లు లేవు:
కామెంట్‌ను పోస్ట్ చేయండి
ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.