కనబడకుంటివి బహుకాలముగ

కనబడకుంటివి బహుకాలముగా కలలోనైనను రఘురామా
ఇనకులతిలకా యిటులుండగ నీ మనసెటు లొప్పెను రఘురామా

తప్పులు తోచిన మన్నించవయా దాసుడ గానా రఘురామా
ఎప్పగిదిని నీకోపము తీరెడు నెఱిగించవయా రఘురామా
తిప్పలు పెట్టక దరిసెనమీయర చప్పున నాకిక రఘురామా
ఎప్పుడు నీశుభరూపము గాంచెద నప్పుడు మురిసెద రఘురామా

నీకు గాక మరి యితరుల కెప్పుడు నే తలవంచను రఘురామా
నీకీర్తనమునె చేయుచు నుందును నిచ్చలు ప్రీతిగ రఘురామా
లోకములో పనియేమున్నదిరా నాకిక నిజముగ రఘురామా
ఏకరణిని నినుపొగడని దినముల నిట్లు సహింతును రఘురామా

నారదాది మునులందరు పొగడెడు నారాయణుడా రఘురామా
శ్రీరఘునాయక భక్తజనావన సీతానాయక రఘురామా
కారుణ్యాంబుధి వగు నీవలుగుట కష్టము తోచును రఘురామా
రారా అలుకలు చాలును రామా రమ్యగుణాకర రఘురామా