రామనామ మనే దివ్యరత్నదీప మున్నది

రామనామ మనే దివ్యరత్నదీప మున్నది ఈ

నామదీపప్రభలు నన్ను నడిపించుచున్నవి

దారితోచనీయకుండ దట్టమైన చీకటివలె

పేరుకున్న యజ్ఞానము భీతిగొలుపగా

ఓరీ నీకేల భయము దారిచూపుదు ననుచు

యూరడించి నాకు కలిగి యున్నది యీ దీపము

చిరుప్రమిదలవంటి వాయె చిన్నపెద్ద విద్యలు

కరముల నవిబూని నేను కాననైతి దారి

పరమదివ్యప్రభలనీను ప్రభునామరత్నము

సరియైన దారిచూపె చక్కగ నీ దీపము

రామనామరత్నప్రభల ప్రకాశమున కోర్వక

కామక్రోధాది దుష్టమృగములు దారి తొలగ

నా మనోరథమునెఱిగి నడుపుచు తిన్నగా

స్వామి యింటి దారిచూపె సరసమైన దీపము