లోకేశ్వరునే లోనెంచేవో శోకమోహములు నీకేవీ

లోకేశ్వరునే లోనెంచేవో శోకమోహములు నీకేవీ

లోకవృత్తములు లోనెంచేవో నీకు మనంబున శాంతేదీ

హరి హరి హరి యని హరినే తలచిన

చొరబడగలదా శోకము నీలో

హరిమోహములో నన్నియు మరచిన

ధర నేమోహము తగులును నీకు

 

తారకమంత్రము దాల్చిన మనసున

కోరికలేమియు చేరవు కాదా

శ్రీరఘురాముని చేరుట యొకటే

కోరదగిన దనుకొందువు గాదా

నిరంతరంబును హరేరామ యని

హరేకృష్ణ యని ఆనందించే

నరోత్తమునకు మరే కష్టములు

ధరాతలంబున తగులవు కాదా