చేయుదమా మనసారా శ్రీ సీతారాముల సేవ

చేయుదమా మనసారా శ్రీ సీతారాముల సేవ

మాయనణచు సేవ మనకు హాయిగొలుపు సేవ



కల్లకపటములు లేని మనస్సులు కలవారలమై యందరము

ఎల్లవేళలను హితములు గూర్చెడి యీశుభమూర్తుల కందరము

కొల్లగ వరములు భక్తుల కెప్పుడు  కురసెడి వారల కందరము

చల్లగ జగముల నేలుచుండు మన తల్లిదండ్రుల కందరము



భూరికృపాళువు లైన వీరిని పుణ్యాత్ములు సేవింతురట

వీరికి సేవలు చేసెడు వారికి కోరికలు నెరవేరునట

కోరగ వలసిన దేమియు నుండని గొప్పస్థితియు కలుగునట

చేరి కూరిమి మీరగ వీరిని సేవించినచో మోక్షమట



చీకటి కొంపలు వెలువడి వచ్చి సీతారాముల కొలిచెదమా

ఆకలి దప్పిక లవలకు నెట్టి అమ్మను నాన్నను కొలిచెదమా

ప్రాకటముగ హరిభక్తు లందరము వీకొని యాశా మోహంబులను

శ్రీకరులగు మన జననీజనకుల సేవలుచేసి తరించెదమా