సుంత యోచించి చూడు

సుంత యోచించి చూడు  మంతకాంతకుండు లోన

చింతించుచు నుండు హరిని శ్రీరాముని చింతించుము

ఎంతదాక విష్ణుభక్తి యంతరంగ మందు పుట్ట

దంతదాక నజ్ఞానం బంతరించదు

ఎంతదాక భాగవతుల సంతసమున గొలువవో

యంతవరకు పామరత్వ మంతరించదు

ఎంతదాక విష్ణునామ చింతనమున మనసునిలువ

దంతదాక రిపువర్గం బంతరించదు

ఎంతదాక విష్ణురూప మంతరంగ మందు నిలువ

దంతదాక భవబంధము లంతరించవు

ఎంతదాక విష్ణుతత్త్వ చింతనమును చేయకుందు

వంతదాక నా యవిద్య యంతరించదు

ఎంతదాక నెల్లచోట్ల నీశ్వరుడగు హరియె తోచ

డంతదాక మిథ్యాజగ మంతరించదు

ఎంతదాక వెన్నునే నిరంతరముగ వేడవో

యంతదాక భవమోహం బంతరించదు

ఎంతదాక శరణాగతి చింతించవు శౌరికి నీ

వంతదాక మోక్ష మబ్బు టన్నది లేదు