శ్రీమారుతీ

సీతారామ భృత్యవర్య శ్రీమారుతీ నీకు
చేతులెత్తి మ్రొక్కెదను శ్రీమారుతీ

ఇంతవాడ వంతవాడ వెంతవాడ వందునయా
  చింతలన్ని పారద్రోలు శ్రీమారుతీ ని
శ్చింతగాను రామనామ చింతనంబు చేయువేళ
  చెంతనుండి కాపాడెడు శ్రీమారుతీ ఆ
పంతగించు రాకాసుల యంతుజూచు రామకార్య
  చింతనాపరుండవైన శ్రీమారుతీ మద
నాంతకుడవు స్వామి యంతకాంతకుడవు కదా నీ
  యంతవాడు లేడందు నయా మారుతీ

ఎంత కష్టకార్య మైన హృదయపూర్వకముగ నిన్ను
  చింతించిన నెరవేరును శ్రీమారుతీ అది
ఎంత దుష్టపీడ యైన ఎంచి నిన్ను రక్షకునిగ
  చింతించిన తొలగిపోవు శ్రీమారుతీ అది
ఎంత రోగబాధ యైన అమితశ్రధ్ధతో నిన్ను 
   చింతించిన చక్కబడును శ్రీమారుతీ 
ఎంత మనోవ్యాధి యైన నాత్మశుధ్ధిగా నిన్ను
   చింతించిన స్వస్థుడగును శ్రీమారుతీ