హరి చేసేదేమో అందమైన లీల

హరి చేసేదేమో అందమైన లీల
నరుడు చేసేదేమో నానాగోల

ధర మీద నరుని పెట్టి తలలోన తెలివి పెట్టి
హరి యాట మొదలుపెట్టు నటు పిమ్మటను
నరుడు మాయ తెగులుపట్టి హరియాట వదలిపెట్టి
మరియేదో దారిపట్టి తిరుగుచుండేను

మరపుమందు మ్రింగినట్లు మరులతీవ త్రొక్కినట్లు
హరియిచ్చిన బుధ్ధినే మరిచిన పిదప
హరియాటే మరచినట్లు హరియెవరో తెలియనట్లు
నరుడేమో ధరపైనే తిరుగుచుండేను

హరినామము తనబుధ్ధికి స్ఫురియించే దెప్పుడో
హరేరామ హరేకృష్ణ యనేదెప్పుడో
నరుడు తన్నుతానెఱిగి సరిగ నాడే దెప్పుడో
హరిలీల లోనెఱిగి మురిసే నపుడు