బ్రహ్మాస్త్రము వేయవయా రావణుని పైన
బ్రహ్మజనక ఎందులకీ బంతులాట
ఒకటికాదు రెండుకాదు ఓహో రామా
ఒక వారము దినములాయె నోయి నేటికి
ఒకొటొకటిగ నూఱుతలల నుత్తరించినా
అకటకటా వీడు చచ్చుటన్నది లేదే
సమరవిజయశీల రామ సమీపించెను
కుమతి రావణునిచావు కొఱకు సురవరులు
విమలమనస్కులు పల్కిన వేళ శీఘ్రమే
సమయించుము వీని రామచంద్రుడా యిక
మిన్న యని బ్రహ్మాస్త్రము మేదినీశుడా
ము న్నగస్త్యు డిచ్చె నీకు ముదమారగా
తిన్నగా నద్దాని వేయ దేవదేవుడా
నిన్ను వరించేను జయము నిశ్చయంబుగా
