ఎవరి కేమనుచు విన్నవింతునయ్యా

ఎవరి కేమనుచు విన్నవింతునయ్యా
చివరికి నీవే దగాచేసిన పిదప

కరిరాజును కాచితివని గట్టిగా నమ్మితిని
మరి నీవు ప్రహ్లాదవరదుడవని నమ్మితిని
హరి యంత మంచిపే రణిగిపోవు రీతిగా
సరకుచేయవు నేను సలిపిన వినతులను

సురవైరిరావణాసురుని కూల్చినా వందురు
నరకకౌరవాదులను పరిమార్చినా వందురు
మరి చిన్న జబ్బునే‌ మరలించ లేనట్టి
వరవిక్రమము నెంత వర్ణింతు నయ్యా

కొసరి వరములిచ్చే కోదండరాముడా
వెస నీవు సోదరుల ప్రేమించువాడవై
మసలితివే యీరీతి మరి మాదు ప్రేమలును
అసలుసిసలు ప్రేమలే యని కావ వైతివి