28, మే 2021, శుక్రవారం

నీసరివారే లేరు నీరజాక్ష

నీసరి వారే లేరు నీరజాక్ష నీ
దాసుల మేలుకోర తామరసాక్ష

చక్కనైన కరుణగల జలరుహాక్ష మా
దిక్కువని నమ్మితి మిందీవరాక్ష
చక్కనయ్య నీవారము శతపత్రాక్ష మా
మ్రొక్కులందుకోవయ్య పుష్కరాక్ష

కూరిమి చూపవయ్య కుశేశయాక్ష సం
సారబాధ లణచవయ్య సారసాక్ష
నేరము లెంచకయ్య సారంగాక్ష నీ
వారమె నిశ్చయముగ వారిజాక్ష

కరిరాజు నేలినట్టి ఖరదండాక్ష సుర
విరోధి మూకనణచు బిసరుహాక్ష
నరనాథ రామచంద్ర నాళీకాక్ష శుభ
వరవృష్టి కురియవయ్య పంకజాక్ష